Azkoitia

'1907tik herrigintzan', Batzokiaren historia bideoan bildu du Pello Larrañagak

Azkoitiko Batzokia ez da eraikin hutsa: mende bat baino gehiagoko ibilbidea duen erreferentzia politiko eta soziala da herrian. 1907an sortua, abertzaletasunaren eta euskararen babesle, alderdikideen eta jarraitzaileen bilgune eta herrigintzaren motor izan da urte luzez. Orain, berritze prozesuaren ondoren, ateak berriro zabaldu ditu, indarberrituta.

Batzokixe tabernaren irekieraren bueltan, Azkoitiko Uri Buru Batzarrak egitarau zabala antolatu du, Batzokiaren historian zehar bidaiatzeko eta etorkizunari begiratzeko aukera eskainiz. Jarduera nabarmenetako bat Batzokiaren eta EAJren ibilbidea laburbiltzen duen ikus-entzunezkoa izan da. Belaunaldi ezberdinetako lekukotasunak jaso ditu Pello Larrañagak zuzendu duen bideoak: pasadizoak, oroitzapenak eta garai ezberdinetako begiradak uztartuz. Ordubete pasatxoko dokumentala jada ikusgai dago Azkoitiko EAJren YouTubeko kanalean.

Bideoaren estreinaldia aurreko astean egin zen, eta Batzokia bete zen alderdikideei zuzendutako saioan. «Giro hunkigarria izan zen, memoria kolektiboa partekatzeko eta etorkizunari ilusioz begiratzeko une aproposa», esan dute alderdikideek.

Batzokiaren inaugurazioaren inguruko egitarauaren barruan, ekitaldi politikoa izango da igande honetan, maiatzaren 25ean, 'Katea ez da eten. Alderdia gara' lelopean, 12:30ean izango da ekitaldia, Ikurriñaren plazan, Bertan izango dira Maria Eugenia Arrizabalaga GBBko presidentea eta Aitor Esteban EBB presidentea. Asier Aranbarri, Azkoitiko Uri Buru Batzarreko burua izango dute alboan.

Aurrez, 12:00etan, ikurriñaren igoera ekitaldia izango dute Batzokian bertan.