Kalitate handiko lanak Rikardo Arregi Sarietan

Lau kazetariren lanak saritu ditu larunbat honetan Rikardo Arregi Kazetaritza Sarietako epaimahaiak. Aurten «kalitate handiko» 31 lanen artean Julen Iriondok, Goienako kazetariak, jaso du sari nagusia Jon Salaberria ikusentzunezkoari esker, pertsonaiaren «irudi heroikotik ihes egin eta bere konplexutasuna» erakusteagatik. Kazetari Berria saria Samara Velterentzat izan da, 2014ko irailean Eskoziako erreferendumari buruz Berrian argitaratutako artikulu sortagatik.

Horiekin batera, epaimahaiak bi sari berezi ematea erabaki du «aurtengo lanek izan duten kalitateagatik», Gaur 8ko Mikel Ibargoienek eta Berriako Iñigo Astizenek jaso dituztelarik. Lehenengoak emakume kirolarien inguruko sailean egindako lanagatik, eta bigarrenak Kantuan diren lekuak izeneko erreportajeagatik.