Leioako 25. Umore Azokak 22.000 ikusle baino gehiago bildu ditu

Lau egunetan zehar Leioako kaleetan, antzerki, dantza, zirku, musika eta beste hainbat diziplina artistikoen 50 talderen eskutik 100 ikuskizun baino gehiago eskainiz 22.000 ikusle baino gehiago bildu ditu. Besteak beste, Taiwan, Japonia, Portugal, Belgika, Erresuma Batua edo Argentinatik heldutako zazpi konpainiak parte hartu dute. Ikuskizun jendetsuenen artean La Nordika taldearen 'Tres tristres trols' nabarmendu da, baita Andoni Aresti Dantza Eskolarena, Chien Hung Kuo-ren 'Moving Zen', Hortzmugaren 'Hasta siempre, hasta nunca' eta Siroko taldearen 'Láppel du vide' ere.

Epaimahaiak lanen kalitatea nabarmendu du eta, ohikoez gain, bi aipamen berezi eman ditu. Euskadiko Ikuskizun Onenaren Saria Zirkozaurreren 'Ardatzak' lanarentzat izan da, eta Munduko Ikuskizun Onenaren Saria ManoaMano taldearen 'Noso3' proposamenari eman zaio. Komorebi taldearen 'Argilunak' eta Zanguango konpainiaren 'El peor espectáculo del mundo... de momento' lanek jaso dituzte bi aipamen bereziak. Sari horiekin batera, publikoak Komorebi konpainiaren 'Argilunak' lanari eman dio Euskarazko Ikuskizun Onenaren saria.

Bestalde, sektoreko 300 profesional baino gehiagok kaleko arte eszenikoen topagune bihurtu dute Leioa aurten ere. Azokak 28 espazio eszeniko izan ditu, bi berri barne (Udondoko bulebarra eta Plaza Gorria), eta 3 ibilbide ibiltari, espazio publikoan sorkuntza garaikidea bultzatzeko plataforma gisa betetzen duen eginkizuna sendotuz.

Diziplina anitzeko programazioa eskaini du, adin eta publiko guztientzako proposamenekin, eta 27 erabateko estreinaldi, 18 estreinaldi Euskadin eta urteurrenerako bereziki sortutako bi lan aurkeztu dira.

Iban Rodriguez Etxebarria Leioako alkateak adierazi duenez, Umore Azoka «sektorearentzat funtsezkoa den hitzordu gisa aldarrikatu da berriro, eta ikusleek ez dute galdu nahi». «Ikusle kopuruak agerian uzten du azoka honek sortzen duen interesa, proposamenen kalitateak eta aniztasunak bermatzen baitute», gaineratu du.