Kultur Astea, bihartik igandera arte

Astelehenetik igandera bitartean kultur ekitaldi ugari izango dira Adunan. Astean zehar, emanaldi guztiak Kultur Aretoan egingo dira. Bihar astelehena, 'Bizi Abentura Hegoamerikan' ikus-entzuneko emanaldia eskainiko dute Maitane Garmendia eta Beñat Doyharzabalek 19:00etan.

Asteartean, hilak 17, Jakoba Errekondok 'Bizi Baratzea' liburua aurkeztuko du 19:00etan. Asteazkenean Aduna eta El Salvadorreko Segundo Montes komunitatearen arteko senidetzea berretsiko da, Euskal Fondoa, Zizurkil eta Adunako elkartasun taldeen eskutik 19.30ean.

Haurrentzako ekitaldiak ere antolatu dira. Ostegunean 17:00etan Elordi plazako aretoan 'Azken Eguzkilorea' antzezlana eskainiko da eta, ondoren, 19:00etan, euskal jantzien inguruko hitzaldi-ikastaroa eskainiko du Atonduk Kultur Aretoan.

Ostiralean Santa Zezilia ospatuko da herrian. Loatzo Musika Eskolako ikasle eta irakasleek Kalejira egingo dute eta ondoren merienda izango dute. 21:30ean, Erramun Martikorenak kantu jaialdia eskainiko du Elizan.

Larunbatean, Naiara Txurrukak kontserba ikastaroa emango du Txulobi elkartean 9:00etatik 13:00etara. Ikastaroa doakoa izango da. 11:30ean kantu jira herrikoia egingo da herrian zehar eta 16:00etatik aurrera Txulobi elkartean Euskal Herriko Mus Txapelketako Adunako kanporaketa jokatuko da. Gainera, 15:30etik aurrera, haur eta gazteentzako puzgarriak, zezen mekanikoak eta jolasak. Igandean mendi martxa egingo da herritik Atxulondoko burdinolara.