Babarrunaren jaitsierak eman ziren hasiera jaiei

Albizturko Andre Mariaren jaiak atzo arratsaldean hasi ziren. Azken urteen moduan, babarrunaren jaitsierak eman zien hasiera jaiei. Jarraian, Arandia anaiak trikitilariek kalejira egin zuten herrian zehar eta Albiztour txirrindulari lasterketa izan zen. Haur, gazte zein helduek parte hartu zuten herria gurutzatzen duen lasterketan. Plazara iristen lehena Julen Dorronsoro izan zen helduen mailan eta Hodei Ugartemendia haurretan.

Gaur igandean, txistularien kalejirarekin hasiko da egitaraua goizeko 9:00etan. 11:15ean Meza Nagusia ospatuko da Andre Mariaren Jasokundearen elizan eta ondoren toka txapelketa herrikoia antolatuko da. Arratsaldean, helduen pilota partiuak jokatuko dira frontoian 18:00etatik aurrera eta 23:00etan Zesuma taldearekin dantzaldia izango da. Bihar astelehenean, gazte eguna izango da Albizturren. Goizeko 11:30ean triki-poteoa izango da. 14:00etan haurren eta gazteen bazkaria izango da eta bazkalondoren, 16:00etan, karaokea eta gazteentzako jolasak.