Jendetza bildu da Santa Krutz Egunean

Santa Krutz Eguna handia da, andoaindar askorentzat. Egun ofiziala San Juan eguna bada ere, antzeko garrantzia hartu du azken urteetan maiatzaren 3ak. Banderaren jaitsiera eta Urki dantza taldeko kideen emanaldia, tradizio eta sinbolismo handiko ekitaldia da. Aurten, Urkiko dantzariek lehenbiziko aldiz egin zuten 'Banderaren Arboltzearen' errituala.

Santa Krutz Egun honetan, betigo legez, Bandera Jaitsiera egin du Udal korporazioak. Udaletxean bildu eta Zubiaurreraino jaitsi dira, Olagain Txistulari Bandako kideen laguntzaz. Zubiaurre etxean Udal korporazioak zain zituen Urki Dantza Taldeko kideak.

Ezpata dantzari hasiera eman zioten, eta, ondoren, ikurrinaren jaitsiera, meza, eskopeteroen emanaldia eta brokel dantza eskaini zuten. Herritar askok interes handiz jarraitu zuten ekitaldia. Ordu horretan zubia eta Espigoia jaiaren erdigune bilakatu ziren. Meza amaituta, txorixo egosia eta txakolia eskaini zituen Jai Batzordeak. Eguraldi bikaina izan da.