Ipar martxaren onurak Cristina Gonzalez Castroren eskutik

Cristina Gonzalez Castro onkologoa bihar Amasa-Villabonan izango da ipar martxaren onurei buruz hitz egiteko. Oriaibaia Nordic Walking elkarteak antolatutako saioan, iluntzeko 19:00etan, Gurea Zinema aretoan izango dena, Gonzalez Castro Nordic Walking modalitateko ariketek hainbat minbizitan duen eraginari buruzko jakintzan mintzatu da.

Onkologoaren esanetan «ipar martxa talde honetarako egokia egiten duten ezaugarri jakin batzuk dituen ariketa da. Ariketa aerobiko osoa da, gorputzaren goiko eta beheko zatiak erabiltzen ditugu, kate muskular handi guztiak erabiltzen ditugu aurrera mugitzeko. Makilak ez dira erabiltzen aurrean bertikalean jartzeko modu tradizionalean, baizik eta ibiltzeko modu naturalari erantsita erabiltzen ditugu, diagonalean, babesa eta propultsioa ematen digute. Gorputzaren goialdea ere lantzean ariketa aerobiko oso osoa bihurtzen da». Gainera, bere esanetan, «emakume asko sufritzeko arriskuan daude edo linfedema bat dute, beso baten hantura, alegia. Ibilera nordikoaren teknika egokia egiten duzunean, eskuak irekitzen eta ixten dituzu, eta, beraz, odol-zirkulazioa eta zirkulazio linfatikoa errazten dituzu. Horregatik esaten da positiboa dela. Sorbaldaren mugimendu-tartea ere hobetzen da. Alderdi horiek dira azpimarragarrienak».

Bestalde, Amasa-Villabonan egoitza duen Oriaibaia Nordic Walking elkarteak hainbat ekitaldi antolatu ditu villabonatarrek eta interesa duten edozein herritakoek ere Ipar Martxaren ezagutza izateko. Honela, bihar goizeko 10:00etatik 12:00etara Ipar Martxa edota Nordic Walking kirola ezagutzeko tailerrak egongo dira Amasa-Villabonako Erreboteko Plazan.

Oriaibaia Elkarteko instruktoreak diren Juanma Mujika eta Ana Bengoa arituko dira herritarrei Ipar Martxako teknikak irakasten dohain eta horretarako beharrezkoak diren bastoiak ere, Oriaibaia elkarteak utziko dizkie bertaratuei. Honela, parte hartzen dutenei Oriaibaia elkartearen eskutik buff bat oparituko zaie eta baita Gipuzkoako Foru Aldundiko kirol zuzendaritzatik ere Emakumeok Mugimenduan programa dela-eta mugikorra eramateko gerriko bana oparituko die Gipuzkoako Foru Aldundiak, kirola egiteko prestatu duen App bat mugikorrean instalatuz programa honetan parte hartzen dutenei.

Esan, urtean zehar hainbat ekimen bideratzeko Amasa-Villabonako udalak Oriaibaia elkarteari diru-laguntza onartu diola eta elkarteak Villabonan bertan kirol honen berri eman nahi izan duela Amasa-Villabonan bertan asteburu osoa ipar martxari eskainiz.

• Temas
• Villabona